ដោយ ៖ កោះឯករាជ្យ(កោះសន្តិភាព)ថ្ងៃ សុក្រ ទី ៣១ ខែ ធ្នូ ឆ្នាំ ២០១០
ខេត្តបន្ទាយមានជ័យ ៖ បន្ទាប់ពីជួបប្រជុំពិភាក្សាគ្នារវាងក្រុមមន្ត្រីយោធាកម្ពុជា- ថៃ (ភូមិភាគ៥កម្ពុជា-ភូមិភាគ១ថៃ) នៅក្នុងខេត្តស្រះកែវ ប្រទេសថៃរួចមក គំរោងចុះពិនិត្យបង្គោលឡាក់លេខ៤៦ និង៤៧ នាវេលារសៀលថ្ងៃទី៣១ ធ្នូ ២០១០ នៅចំណុចដែលទាហានការពារព្រំដែនកម្ពុជាចាប់ពលរដ្ឋថៃ៧នាក់នោះ ត្រូវបានផ្អាកទៅវិញ បន្សល់ទុកតែកំលាំងទ័ពត្រៀមការពារ និងរៀបចំសណ្តាប់ធ្នាប់ច្រើនស្អេកស្កេះ ជាមួយនឹងគ្រឿងសព្វាវុធទំនើបៗ ជាពិសេសនៅក្នុងខ្សែបន្ទាត់ភូមិណងច័ន្ទ ឃុំគោកធ្យូង ស្រុកគោកធ្យូង ប្រទេសថៃ គេឃើញមានឧទ្ធម្ភាគចក្រ៣គ្រឿង និងរថពាសដែកច្រើនគ្រឿងដាក់ពង្រាយ ។
តាមប្រភពព័ត៌មានបានឱ្យដឹងថា ព្រឹកថ្ងៃទី៣១ ធ្នូ ២០១០ នេះ ក្រុមអ្នកគាំទ្រអាវលឿង ប្រមាណ១០០នាក់ ជិះឡានជាង២០គ្រឿង បានធ្វើដំណើរមកកាន់ភូមិណងច័ន្ទ ឃុំគោកធ្យូង ស្រុកគោកធ្យូង ខេត្តស្រះកែវ ដើម្បីត្រួតពិនិត្យមើលបង្គោលឡាក់ព្រំដេនលេខ៤៦ ប៉ុន្តែត្រូវបានអាជ្ញាធរ និងទាហានថៃបណ្តេញឱ្យត្រឡប់ទៅវិញ ព្រោះពួកអាវលឿងនេះមកបង្កភាពរញ៉េរញ៉ៃ...ប៉ុន្តែមុនពេល ត្រឡប់ទៅវិញ ពួកអាវលឿងនិយាយថា ពួកគេនឹងទៅហៅមនុស្សមកកាន់ទីនេះឱ្យបានរាប់ពាន់នាក់ ។
មកដល់រសៀលម៉ោង៣ថ្ងៃដដែល ក្រុមមន្ត្រីយោធាកម្ពុជា-ថៃ (ភូមិភាគ៥កម្ពុជា-ភូមិភាគ១ថៃ) ដែលជួបប្រជុំគ្នានៅក្នុងខេត្តស្រះកែវនោះ នៅមិនទាន់ត្រូវបានគេបង្ហើបឱ្យដឹងពីលទ្ធផលយ៉ាងណានោះទេ... ប៉ុន្តែតាមគំរោងថា ពេលបញ្ចប់កិច្ចប្រជុំពួកគេទាំងពីរភាគីនឹងនាំគ្នាមកកាន់ភូមិ ណងច័ន្ទ (ថៃ) ទល់មុខភូមិជោគជ័យ (កម្ពុជា) ដើម្បីពិនិត្យមើលខ្សែបន្ទាត់ព្រំដែន ជាពិសេសបង្គោលឡាក់លេខ៤៦ និង៤៧ ត្រូវបានផ្អាកទៅវិញ ធ្វើឱ្យក្រុមអ្នកកាសែតជាច្រើននាក់រង់ចាំថតរូប និងយកព័ត៌មានទទួលរងនូវការខកចិត្ត ៕