ប៉ូលីសក្រុងប៉ោយប៉ែតក្របួចជនសង្ស័យចែកចាយ និងសេពថ្នាំញៀនបាន៧នាក់
កាលពីថ្ងៃទី២០ ធ្នូ ២០១០ វេលាម៉ោង ៨:៣០នាទីព្រឹក ប៉ូលីសក្រុងប៉ោយប៉ែតបានធ្វើការឃាត់ខ្លួនជនសង្ស័យចែកចាយ និងសេពថ្នាំញៀនចំនួន ៧នាក់ នៅភូមិ ក្បាលស្ពាន សង្កាត់/ក្រុង ប៉ោយប៉ែត នៅចំណុចផ្លូវរថភ្លើង ទល់មុខវត្ត បាលិលេយ្យ ខណៈពួកគេកំពង់ធ្វើសកម្មភាពចែកចាយ និងសេពថ្នាំញៀន។ ជនសង្ស័យទាំង ៧នាក់នោះ រួមមានៈ ១/ឈ្មោះ កែវហាក់ ភេទប្រុស អាយុ ៥៣ឆ្នាំ ២/ឈ្មោះ អឿនយ៉ុន ភេទស្រី អាយុ ៥១ឆ្នាំ ៣/ឈ្មោះ នាង ផល្លា ហៅ ម៉ៅ ភេទប្រុស អាយុ ៤៧ឆ្នាំ ៤/ឈ្មោះ ភី សុភ័ណ ភេទប្រុស អាយុ ២៩ឆ្នាំ ៥/ឈ្មោះ យិន សាវុធ ភេទប្រុស អាយុ ៣៩ឆ្នាំ ៦/ឈ្មោះ ស៊ីថា ភេទប្រុស ៥០ឆ្នាំ ៧/ឈ្មោះ ធាប៉ែត ភេទប្រុស អាយុ ២៥ឆ្នាំ អ្នកទាំង៧រូបនេះ រស់នៅភូមិឃុំកើតហេតុ។ ឈ្មោះ កែវ ហាក់ និងឈ្មោះ អឿនយ៉ុន ជាប្តីប្រពន្ធនឹងគ្នា ក្នុងចំណោម៧នាក់នេះ ឈ្មោះ នាងផល្លា ហៅម៉ៅ និងឈ្មោះ អឿន យ៉ុន ជាអ្នកចែកចាយ ក្រោយពីការឃាត់ខ្លួន។
សមត្ថកិច្ចប៉ូលីសបង្ហាញមុខអ្នកចែកចាយ និងសេពថ្នាំញៀន រួមជាមួយនឹងវត្ថុតាង
ពួកគេ ទាំង៧នាក់ខាងលើ ប៉ូលីសក្រុងប៉ោយប៉ែត បានធ្វើការរឹបអូសបានវត្ថុតាង និងថ្នាំញៀន ប្រភេទយ៉ាម៉ា ពណ៌ក្រហម ចំនួន ១១០គ្រាប់ និងបំពង់ជក់មួយចំនួនធំផងដែរ។ ក្នុងពេលធ្វើការបង្រ្កាបស្រ្តីឈ្មោះ អឿន យ៉ុន ដែលជាអ្នកចែកចាយ និងជាម្ចាស់ផ្ទះ ត្រូវបានប៉ូលីសក្រុងប្រាប់ថា បានលួចទម្លាក់ថ្នាំញៀន តាមប្រហោងរនាបទៅដី ប៉ុន្តែត្រូវប៉ូលីសឃើញទាន់។
លោកអនុសេនីយ៍ឯក អ៊ុំសុផល អធិការក្រុងប៉ោយប៉ែត បានប្រាប់ថា ដោយតាមអនុសាសន៍របស់សម្តេច ហ៊ុន សែន និងដោយមានការណែនាំ និងចង្អុលបង្ហាញពីលោកស្នងការខេត្តក៏ដូចជាលោកអភិបាលក្រុង ទើបលោកបានដាក់កម្លាំងចុះស្រាវជ្រាវ រហូតឈានដល់ចុះបង្ក្រាប និងឃាត់ខ្លួនទាំង៧នាក់នេះតែម្តងទៅ។ ចំពោះជនសង្ស័យទាំង៧នាក់ខាងលើនេះ ត្រូវបានលោកអធិការប្រាប់ថា ក្រោយពីការសួរនាំ និងធ្វើការកំណត់ហេតុរួច និងបញ្ជូនពួកគេទៅស្នងការខេត្តបន្ទាយមានជ័យ ដើម្បីចាត់ការបន្តតាមនិតិវិធីច្បាប់។
ប៉ូលីស បានប្រាប់ឲ្យដឹងថា អ្នកចែកចាយបានសារភាពថា ពួកពិតជាបានប្រព្រឹត្តដូចការចោទប្រកាន់មែន។ ជារឿយៗ គេសង្កេតឃើញថា ក្រុងប៉ោយប៉ែត ជាពិសេសនៅក្នុងភូមិ ក្បាលស្ពាន និងភូមិ បាលិលេយ្យ នៅចំណុចខាងកើតផ្ទះល្វែងមានការចែកចាយថ្នាំញៀនយ៉ាងគគ្រឹក គគ្រេង និងលក់ដូរដូចគេលក់ស្ករគ្រាប់អញ្ចឹង ហើយពេលខ្លះសមត្ថកិច្ចទាំងពីរ បានចុះបង្រ្កាបម្តងម្កាល ប៉ុន្តែពួកចែកចាយទាំងនោះ ឃើញថា មុខដដែលៗ អ្នកខ្លះឃើញប៉េអឹមចាប់ អ្នកខ្លះ ត្រូវបានប៉ូលីសចាប់ ប៉ុន្តែអ្នកទាំងនោះ នៅតែបន្តជារៀងរាល់ថ្ងៃ៕