បន្ទាយមានជ័យៈ ធ្វើពិធីផ្សព្វផ្សាយប្រឆាំងការជួញដូរមនុស្ស និងការរំលោភបំពានអនិតិជនអាយុក្រោម១៥ឆ្នាំ
នៅ បរិវេណសាលាក្រុងសិរីសោភ័ណ មានធ្វើពិធីផ្សព្វផ្សាយ និងប្រឆាំងដាច់ខាត ចំពោះការជួញមនុស្ស ក្រោមប្រធានបទ "យើងរួបរួមគ្នាប្រយុទ្ធប្រឆាំងការជួញដូរមនុស្ស និងធ្វើអាជីវកម្មផ្លូវភេទលើស្រ្តី និងកុមារ" ក្រោមការឧបត្ថម្ភរបស់អង្គការ (ស៊ីដូ) ដែលបានសហការជាមួយសាលាក្រុងសិរីសោភ័ណ នៃខេត្តបន្ទាយមានជ័យ ដោយមានការអញ្ជើញចូលរួមពីលោកជំទាវ ជូ ប៊ុន អេង រដ្ឋលេខាធិការក្រសួងមហាផ្ទៃ លោកស្រី នួម សុភ័ណ អភិបាលរងខេត្តបន្ទាយមានជ័យ លោក អ៊ុំ រាគ្រី អភិបាលក្រុងសិរីសោភ័ណ លោក ស្នងការ លោកប្រធានការិយាល័យការពារអនិតិជនខេត្ត សិស្សានុសិស្ស ព្រមទាំងប្រជាពលរដ្ឋចំនួន ១៥០០នាក់ បានអញ្ជើញចូលរួមក្នុងពិធីនេះផងដែរ កាលពីថ្ងៃទី១៣ ខែធ្នូ ឆ្នាំ២០១០។
លោក គង់ សំណាង នាយកអង្គការ ស៊ីដូ បានមានប្រសាសន៍ក្នុងពិធីនេះថា ឆ្លៀតឱកាសដ៏មានសារៈសំខាន់នេះ អង្គការ ស៊ីដូ ដែលជាអង្គការជាតិ ដោយបានបង្កើតឡើងតាំងពីឆ្នាំ ១៩៩៥ ហើយធ្វើជាដៃគូរអភិវឌ្ឈន៍ជាមួយរដ្ឋាភិបាល ជាពិសេសក្នុងខេត្តបន្ទាយមានជ័យ។ ថ្ងៃនេះ អង្គការ ស៊ីដូរ មានមោទនៈភាព ដោយបានទទួលការគាំទ្រថវិការពីសហភាពអឺរុប(EU) ដើម្បីធ្វើសកម្មភាពប្រឆាំងការជួញដូរមនុស្ស ជាពិសេសទៅលើស្រ្តី និងកុមារ យើងត្រូវតែរួបរួមគ្នាប្រយុទ្ធប្រឆាំងការជួញដូរមនុស្ស និងធ្វើអាជីវកម្មផ្លូវភេទលើស្រ្តី និងកុមារ។
លោក បាននិយាយបន្តទៀតថា អង្គការ ស៊ីដូ បាននឹងកំពុងធ្វើសកម្មភាព ដើម្បីប្រយុទ្ធប្រឆាំងទៅនឹងការជួញដូរមនុស្ស ដោយធ្វើការអប់រំផ្សព្វផ្សាយផ្ទាល់ និងប្រយោល ដើម្បីបង្កើនការយល់ដឹងអំពីគ្រោះថ្នាក់ ឬប៉ះពាល់នៃការជួញដូរមនុស្ស អំពើហិង្សាក្នុងគ្រួសារ មេរោគអេដស៍ ការធ្វើចំណាកស្រុកដោយអសន្តិភាព និងផលប៉ះពាល់នៃការប្រើប្រាស់គ្រឿងញៀន និងគ្រឿងស្រវឹង។
ជា មួយគ្នានេះដែរ លោក អ៊ុំ រាគ្រី អភិបាលក្រុងសិរីសោភ័ណ បានឡើងអាន និងមានចំណាប់អារម្មណ៍ថា ប្រទេសកម្ពុជាយើង នៅពេលនេះ មានឧក្រិដ្ឋជនមួយចំនួន បានប្រព្រឹត្តអំបើជួញដូរមនុស្សឆ្លងដែន ទៅប្រទេសក្រៅ ហើយនាពេលបច្ចុប្បន្ននេះ ជនទុច្ចរិតទាំងនោះ កំពុងតែប្រើប្រាស់គ្រប់មធ្យោបាយ ដើម្បីទាក់ទាញផលប្រយោជន៍ពី បុរស, ស្រ្តី ជាពិសេសយុវវ័យ និងកុមារជាច្រើន ដើម្បីធ្វើការជួញដូរដោយប្រើគ្រប់រូបភាព គ្រប់មធ្យោបាយ និងសំភារៈ ដែលធ្វើឲ្យ បុរស ស្ត្រី និងកុមារ ធ្លាក់ចូលក្នុងការជួញដូរដោយពុំដឹងខ្លួន។
ការ ធ្វើអាជីវកម្មផ្លូវភេទ និងអាជីវកម្មលើកម្លាំងពលកម្ម ក្នុងប្រទេសជាច្រើន ដែលរួមមានដូចជា ប្រទេសថៃ ម៉ាឡេស៊ី ម៉ាកាវ និងតៃវ៉ាន់ ជាដើម។ បុរសៗ ត្រូវបានគេធ្វើអាជីវកម្មលើកម្លាំង ដូចជា សំណង់ នេសាទត្រី រីឯស្រ្តី ត្រូវគេធ្វើអាជីវកម្មផ្លូវភេទ និងបង្ខិតបង្ខំឲ្យធ្វើការជាទម្ងន់នៅតាមផ្ទះ។ ចំណែកកុមារវិញ ត្រូវបានគេធ្វើអាជីវកម្មផ្លូវភេទ និងបង្ខិតបង្ខំឲ្យធ្វើពលករ អ្នកសុំទាន អ្នកបោសថ្នល់ និងអ្នកលក់ផ្កាជាដើម។ អ្នករងគ្រោះជាច្រើន ជឿជាក់ថា ពួកគេមានការងារធ្វើជាអ្នកបំរើនៅតាមផ្ទះ ប៉ុន្តែបន្ទាប់មកត្រូវបានធ្លាក់ទៅក្នុងការធ្វើអាជីវកម្មផ្លូវ ភេទ ដោយមានការបង្ខិតបង្ខំ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ បានឡើងអាន និងលើកជាសំនួរថា អ្នកត្រូវការគិតអំពីសំនួរដូចខាងក្រោម មុននឹងអ្នកចាកចេញពីភូមិស្រុករបស់អ្នក សូមអ្នកព្យាយាមឆ្លើយនឹងសំនួរខ្លួនឯងសិន ទើបអ្នកសម្រេចចិត្ត តើខ្ញុំទៅធ្វើការនៅកន្លែងណា? តើពេលណាខ្ញុំបានប្រាក់កំរ៉ៃ តើគេអនុញ្ញាតិឲ្យខ្ញុំត្រលប់មកផ្ទះវិញដែរ ឬទេ? ពេលដែលខ្ញុំត្រលប់មក តើខ្ញុំអាចទាក់ទងអ្នកណាបាន បើខ្ញុំជួបបញ្ហា!។ បើសិនលោកអ្នកអាចឆ្លើយនឹងសំនួរនេះបាន អ្នកគួរតែកុំទៅ ពីព្រោះគ្មានសន្តិភាពសម្រាប់អ្នកទេ។ ហេតុនេះហើយ ទើបអង្គការ ស៊ីដូ ធ្វើការផ្សព្វផ្សាយឲ្យប្រជាពលរដ្ឋ និងសិស្សានុសិស្សទាំងអស់ឲ្យបានជ្រាប៕ អត្ថបទ៖ នីចាន់នឿន