ស្រ្តី៤នាក់បំរើការងារក្នុងក្លឹបឌីស្កូផ្លេប៊យផ្ទុះកំហឹងបកអាក្រាតថា"រាំស្រាត និងសេពថ្នាំញៀន!"
ស្រ្តី បំរើការនៅហាងឌីស្កូ ផ្លេប៊យ ៤នាក់ បានមកបកអាក្រាតថា ហាងឌីស្កូនេះ រាំស្រាត និងសេពគ្រឿងញៀនពេញទំហ៊ឹង នៅក្នុងទីនោះ ស្ថិតក្នុងបរិវេណកាស៊ីណូផ្កាយ៥ ក្នុងភូមិក្បាលស្ពាន សង្កាត់/ក្រុងប៉ោយប៉ែត។ ស្រ្តី៤នាក់នោះ រួមមានៈ ១/ឈ្មោះ គង់ សំអាត ហៅ អាហ្មួយ អាយុ ២៧ឆ្នាំ ២/ឈ្មោះ លី វ៉ា អាយុ ២៦ឆ្នាំ ៣/ឈ្មោះ ស៊ីវ លាន អាយុ ២៥ឆ្នាំ (នាងៗទាំងបីនាក់ រស់នៅផ្ទះជួល ស្ថិតក្នុងភូមិក្បាលស្ពាន សង្កាត់/ក្រុងប៉ោយប៉ែត) និង៤/ឈ្មោះ ញ៉េន ចិន្តា អាយុ ២៥ឆ្នាំ រស់នៅភូមិប្រជាធម្ម សង្កាត់/ក្រុងប៉ោយប៉ែត។
រឿង ហេតុដំបូង ដែលបណ្តាលឲ្យពួកនាងៗទាំង៤នាក់ ផ្ទុះកំហឹងឡើងនេះ គឺដោយសារ ពួកនាងធ្វើការហើយ ត្រូវថៅកែ មិនបើកប្រាក់ខែឲ្យ ទើបបានជាពួកនាងមកប្តឹងតវ៉ា នៅមុខហាងឌីស្កូផ្លេប៊យ ថែមទាំងមកបកអាក្រាតប្រាប់អ្នកយកព័ត៌មានជាច្រើននាក់ថា ក្នុងហាងឌីស្កូនោះ មានការរាំស្រាត និងមានអ្នកសេពគ្រឿងញៀនទៀតផង។ ពួកនាងបានប្រាប់ឲ្យដឹងថា ពួកខ្លួន ដែលត្រូវថៅកែ មិនបើកប្រាក់ខែឲ្យចំនួន២ខែមកហើយ។ ជាទម្លាប់ការងារពីមុន គេតម្រូវឲ្យរកភ្ញៀវសម្រាប់ចូលផឹកស៊ី នៅក្នុងហាង រឺក្លឹបនោះ ក្នុង១ខែ ឲ្យបាន ៦០ឌីង(ស្មើនឹង៦០កូនកែវតូច) ទើបទទួលប្រាក់ខែ ១ម៉ឺនបាតលុយថៃ ក្នុង១ខែ។ តែសម្រាប់រយៈពេល២ខែនេះ ខាងថៅកែ និងមេការ តម្រូវឲ្យពួកនាង រកភ្ញៀវឲ្យបាន ១៣០ឌីង(ស្មើនឹង១៣០កែវតូច) ទើបបើកប្រាក់ខែឲ្យ ដោយសារក្នុងរយៈពេល២ខែនេះ ពួកខ្លួន រកម៉ូយពុំបានគ្រប់ចំនួន ទើបពួកគេ(ថៅកែ) ពុំបើកប្រាក់ខែឲ្យ។
ស្រី ទាំងនោះ បានបញ្ជាក់ឲ្យដឹងទៀតថា ចំពោះស្រ្តីជនជាតិសៀម ដែលបំរើការនៅទីនោះ ១០ថ្ងៃប៉ុណ្ណោះ ត្រូវបើកលុយម្តង ធ្វើរបៀបនេះ មិនស្មើភាពគ្នាទេ ហើយបើថៅកែ និងមេការ ដាក់កំណត់ឲ្យរកភ្ញៀវបែបនេះ ដូចគេបណ្តេញចេញអញ្ចឹង! ក្រោយពីការអះអាងថាពួកខ្លួន ត្រូវបានថៅកែមិនបើកលុយឲ្យនោះ ក៏បានផ្ទុះកំហឹងមកបកអាក្រាតថា ក្នុងក្លឹបនេះ មានការាំស្រាត និងជក់ថ្នាំញៀនពេញទំហ៊ឹងនៅក្នុងទីនោះ។ ពួកនាង ក៏បានបន្តឲ្យដឹងទៀតថា ក្នុងម៉ោង ១យប់ រំលងអាធ្រាត រហូតដល់ម៉ោង៤ទៀបភ្លឺ ជារៀងរាល់យប់ គេតែងធ្វើរបៀបនេះ(ឲ្យរាំស្រាត) មកលើស្រ្តីទាំង៤នាក់នោះ។ ចំពោះស្រ្តីម្នាក់ក្នុងចំណោម៤នាក់នោះ គឺឈ្មោះ គង់ សំអាត ហៅអាហ្មួយ ធ្លាប់ត្រូវបានស្រ្តីបំរើការងារថៃ ព្រួតវាយធ្វើបាបចំនួន២ដងមកហើយ ថ្មីៗនេះ គេបានដាក់ពាក្យបណ្តឹងទៅអធិការដ្ឋាននគរបាលក្រុងប៉ោយប៉ែត ដើម្បីធ្វើការដាក់ទោសទៅតាមផ្លូវច្បាប់ ប៉ុន្តែសំណងជារដ្ឋប្បវេណី។
សូម បញ្ជាក់ផងដែរថា កន្លងមកមានអ្នកកាងក្នុងក្លឹប ជនជាតិសៀម ធ្លាប់វាយសន្តិសុខខ្មែរនៅទីនោះ ឈ្មោះ ព្រហ្ម បណ្តាលឲ្យរងរបួស នៅក្នុងម៉ោង៣ទៀបភ្លឺ ហើយសន្តិសុខរូបនោះ ក៏បានដាក់ពាក្យបណ្តឹងទៅកងរាជអាវុធហត្ថក្រុងប៉ោយប៉ែត ក្រោយពីទទួលពាក្យបណ្តឹងរួច កងរាជអាវុធហត្ថ ក៏បាននាំខ្លួនជនល្មើសទាំងនោះ មកកាន់ទីបញ្ជាការកងរាជអាវុធក្រុងប៉ោយប៉ែត ប៉ុន្តែប្រភពបាននិយាយថា ជនល្មើសទាំងនោះ ត្រូវបានចេញតាមទ្វារក្រោយ ដោយសុវត្ថិភាព ថ្នូរនឹងប្រាក់បាតសៀម។
ភ្នាក់ងារខ្មែរស្ថាបនា ក៏បានធ្វើការទាក់ទងទៅលោកប្រធានសន្តិសុខកាស៊ីណូផ្កាយ៥ លោក ទៀ ចាង ផងដែរ តែទូរស័ព្ទចូល គ្មានអ្នកឆ្លើយ សូមបញ្ជាក់ផងដែរថា ក្លឹបឌីស្កូផ្លេប៊យនេះ ម្ចាស់ និងថៅកែ ជាជនជាតិថៃ ជួលដីកាស៊ីណូផ្កាយ៥ សម្រាប់ធ្វើអាជីវកម្មខុសច្បាប់៕