ដោយ៖ ស្ថាបនា 12/01/2011 បន្ទាយមានជ័យ
ក្រោយពេលដែល គណៈប្រតិភូមួយក្រុមដឹកនាំដោយលោក អ៊ុង អឿន អភិបាល នៃគណៈអភិបាលខេត្តបន្ទាយមានជ័យ, លោកឧត្ថមសេនីយ៍ទោ ព្រហ្ម មរណៈ នាយសេនាធិការងកងទ័ពជើងគោក ទិសភូមិភាគ៥, លោកឧត្តមសេនីយ៍ត្រី ឈឿន សារិទ្ធ មេបញ្ជាការរងភូមិភាគទី៥ និងជាគណៈបញ្ជាការសមរភូមិមុខ ទិសទី១ ខេត្ត បន្ទាយមានជ័យ, មេបញ្ជាការ មេបញ្ជាការរង គ្រប់កងឯកភាពពាក់ព័ន្ធទាំងអស់ ក្នុងខេត្ត និងមន្រ្តីរាជការ មកពីស្ថាប័នមួយចំនួន ដូចជា មន្រ្តីគយ និងរដ្ឋាក បានដឹកនាំអំណោយ ជាសម្ភារៈ គ្រឿងឧបភោគ បរិភោគ និងថវិកា យ៉ាងច្រើនសន្ធឹកសន្ធាប់ ដើម្បីឧបត្ថម្ភដល់កងកម្លាំងជួរមុខយើង ដែលកំពុងការពារបូរណៈភាពទឹកដីនោះ គេឃើញកម្លាំងជួរមុខហាក់មានទឹកចិត្តរីករាយយ៉ាងខ្លាំង ដោយសារបានការយកចិត្តទុកដាក់ពីសំណាក់ថ្នាក់ដឹកនាំ។ ប៉ុន្តែទន្ទឹមនឹងការទទួលបានអំណោយ និងថវិកា ដែលធ្វើឲ្យកងកម្លាំងជួរមុខ មានការត្រេកអរនេះ ក៏មានប្រភពពីកងកម្លាំងជួរមុខ ដែលឈរជើងក្នុងស្រុក អូរជ្រៅ មកផងដែរនោះថា ក្រោយពីការចែកអំណោយ និងថវិកាដល់កងទ័ពរួចហើយ មានកងទ័ពមួយចំនួន មិនបានទទួលថិវកា ជាអំណោយទេ ត្រូវបានមេស៊ីដាច់ដាក់ហោប៉ៅតែម្នាក់ឯង។
កងកម្លាំងត្រៀមការពារបង្គោលឡាក់ ៤៦
ប្រភព បង្ហើបយ៉ាងច្បាស់ថា កងទ័ពដែលមិនទទួលបានថវិកានោះ គឺនៅ គ3 វរៈ 513 កងពលលេខ 51 ដែលមានមេឈ្មោះ ខែម សុវណ្ណ បច្ចុប្បន្នកំពុងឈរជើងនៅឃុំ អូរបីជាន់ ស្រុក អូរជ្រៅ។
ប្រភព បន្តទៀតថា ក្នុងគមួយនេះ កំលាំង 3(ខ) ស្មើនឹង ៧១នាក់ ពេលដែលទទួលថវិកា ពីតំណាងប្រតិភូរួច មេគ បានស៊ីដាច់លុយកូនចៅ ចំនួន ប្រហែល១០នាក់ ដូចជាឈ្មោះ ហាក់ ទាន, ធី, រ៉ា, ព្រំវិឆ័យ, គាំង... និងមួយចំនួនទៀត ពុំត្រូវបានស្គាល់ឈ្មោះ។ ប្រភពបន្តឲ្យដឹងទៀតថា ក្នុងចំណោមកងទ័ពមួយចំនួន ដែលមិនទទួលបានលុយ មានអ្នកខ្លះតូចចិត្ត រហូតដល់ស្រែកយំ អ្នកខ្លះ ចង់រត់ទៅផ្ទះវិញ ហើយក្រោយហេតុការណ៍ភ្លាមៗ ប្រភពលេចឮថា មានទាំងមេរង(ខ)ម្នាក់ ដែលមិនទទួលបានលុយ ក៏បានទូរស័ព្ទទៅប្តឹងលោក ង៉ែត ព្រឿង មេបញ្ជាការវរៈ 513 នាពេលព្រលប់នោះផងដែរ ហើយក៏មានព័ត៌មានថា ព្រោះតែការអាណិតអាសូរដល់កម្លាំងទ័ពរបស់ខ្លួនឈ្មោះ នាង សុវណ្ណ មានតួនាទីអនុសេនីទោរង(គ) ក៏បានយកលុយខ្លួនឯងទាំង ៣៥០០០(បីម៉ឺនប្រាំពាន់រៀល) ដែលជារបបអំណោយ ចែកឲ្យកូនចៅដែលអត់ៗ ម្នាក់ ៥ពាន់រៀល បានចំនួន ៧នាក់ ដើម្បីជាការលួងលោម និងលើកទឹកចិត្ត កុំឲ្យកំលាំងមួយចំនួនខឹងផងដែរ។ កម្លាំងជួរមុខ ក្នុងគ3 ខាងលើ ក៏បានបញ្ចេញកំហឹងផងដែរ។
លោក ង៉ែត ព្រឿង មេបញ្ជាការវរៈសេនាតូចលេខ 513 បានប្រាប់អ្នកយកព័ត៌មានតាមរយៈទូរស័ព្ទថា រូបគាត់ បានបែងចែកអំណោយដែលឯកឧត្តមអភិបាលខេត្តផ្តល់ឲ្យនោះ ចែកចាយគ្រប់ៗគ្នាអស់ហើយ អ្នកណាថាអត់បានអំណោយនោះ ប្រាប់ឈ្មោះគាត់មកមើល! គាត់បានបានបន្តឲ្យដឹងទៀតថា អ្នកដែលអត់បានអំណោយប្រហែលមិនចុះទៅធ្វើការទេដឹង បានជាងអត់នោះ? ទោះបីជាលោកមេបញ្ជាការ ង៉ែត ព្រឿង បានបំភ្លឺប្រាប់អ្នកយកព័ត៌មានថា បានទទួលអំណោយនោះក្តី ក៏មិត្តអ្នកអានគេពុំជឿដែរ ពីព្រោះពលទាហាន និងនាយទាហានខាងលើ បានប្រតិកម្មរួចទៅហើយ។ លោកមេបញ្ជាការកត់ឈ្មោះ ចំនួនទាហាន បញ្ជូនទៅឲ្យអភិបាលខេត្ត ចុះហេតុអ្វី អ្នកខ្លះបាន អ្នកខ្លះអត់ ពីព្រោះចំនួនកងទ័ពមានឈ្មោះគ្រប់ៗគ្នា៕ ដោយ៖ ធីម ថា