ខ្មែរ-ថៃប្រារព្ធពិធីលើកលែងទិដ្ឋាការ
ដោយ សួន សុផលមុន្នី
2010-12-16
ព្រះរាជាណាចក្រ កម្ពុជា និងព្រះរាជាណាចក្រថៃ នៅថ្ងៃព្រហស្បតិ៍ ទី១៦ ខែធ្នូ ឆ្នាំ២០១០នេះ បានប្រារព្ធពិធីជាប្រវត្តិសាស្ត្រនៃការលើកលែងទិដ្ឋាការឆ្លងដែន សម្រាប់ប្រជាពលរដ្ឋទាំងពីរប្រទេស បន្ទាប់ពីប្រមុខរាជរដ្ឋាភិបាលនៃប្រទេសទាំងពីរបានធ្វើការឯកភាព រួចមក។
អភិបាល ខេត្តបន្ទាយមានជ័យ លោក អ៊ុង អឿន (ឆ្វេង) ចាប់ដៃជាមួយអភិបាលខេត្តស្រះកែវ លោក សានិត ណាក់ ស៊ុបស្រ៊ី ក្នុងពិធីប្រកាសលើកលែងទិដ្ឋាការរវាងប្រទេសកម្ពុជា-ថៃ នៅច្រកទ្វារអន្តរជាតិប៉ោយប៉ែត ក្នុងខេត្តបន្ទាយមានជ័យ នៅថ្ងៃទី១៦ ខែធ្នូ ឆ្នាំ២០១០។
ទិវាអនុស្សាវរីយ៍ជាប្រវត្តិសាស្ត្រនៃការលើកលែងទិដ្ឋាការឆ្លងដែន សម្រាប់ប្រជាពលរដ្ឋទាំងពីរប្រទេស បានធ្វើឡើងនៅលើស្ពានមិត្តភាពកម្ពុជា-ថៃ រវាងអាជ្ញាធរខេត្តបន្ទាយមានជ័យ និងអាជ្ញាធរខេត្តស្រះកែវ បន្ទាប់ពីរាជរដ្ឋាភិបាលកម្ពុជា និងរដ្ឋាភិបាលថៃ បានព្រមព្រៀងគ្នាកាលពីថ្ងៃទី៨ ខែកក្កដា ឆ្នាំ១៩៩៩មក។
អភិបាលខេត្តបន្ទាយមានជ័យ លោក អ៊ុង អឿន បានមានប្រសាសន៍ថា នយោបាយលើកលែងទិដ្ឋាការឆ្លងដែននេះ មានសារប្រយោជន៍ដល់ប្រជាពលរដ្ឋទាំងពីរប្រទេស ៖ «មានផលប្រយោជន៍ ច្រើនណាស់សម្រាប់ប្រជាពលរដ្ឋទូទៅ។ កាលពីដើមយើងជិះឡានពីនេះទៅដល់ភ្នំពេញ ធ្វើវីសានៅភ្នំពេញ បានបកមកវិញ រយៈពេលយ៉ាងឆាប់បំផុត ៤ថ្ងៃ ទៅ ១សប្ដាហ៍ បច្ចុប្បន្នយើងមានលិខិតឆ្លងដែន១ ចង់ទៅប្រទេសថៃ វ៉ៃតែម្ដងមិនបាច់ឆ្លងកាត់។ ប្រជាជនថៃ ដូចគ្នាអ៊ីចឹង ធ្វើកំណើនសេដ្ឋកិច្ចពិតជាមានការកើតឡើង ទី១ ពីវិស័យទេសចរណ៍ ទី២ ការផ្លាស់ប្ដូរអ្វីៗផ្សេងៗទៀត វាជាការងាយស្រួល»។
អភិបាលខេត្តស្រះកែវ លោក សានិត ណាក់ ស៊ុបស្រ៊ី បានមានប្រសាសន៍ថា ការលើកលែងទិដ្ឋាការសម្រាប់ប្រជាពលរដ្ឋទាំងពីរប្រទេស គឺក្នុងទិសដៅបង្កើននូវទំនាក់ទំនងមិត្តភាពកម្ពុជា-ថៃបន្ថែមទៀត និងគោលដៅទាញអារម្មណ៍ភ្ញៀវទេសចរណ៍អន្តរជាតិផងដែរ។
ទន្ទឹមគ្នានេះ លោកអភិបាលខេត្តស្រះកែវថៃ បានលើកទឹកចិត្តឲ្យប្រជាពលរដ្ឋខ្មែរ ឆ្លងដែនទៅទស្សនាក្នុងប្រទេសថៃ និងជំរុញប្រជាពលរដ្ឋថៃ ឆ្លងដែនទៅទស្សនានៅប្រទេសកម្ពុជាដូចគ្នា ៖ «ស្របពេលជាមួយគ្នា នេះ ភាគីថៃ ឆ្លងមកលេងទឹកដីកម្ពុជា ឆ្លៀតឱកាសនេះសុំអញ្ជើញបងប្អូនកម្ពុជា ឆ្លងមកលេងខាងស្រុកថៃ ព្រោះថា ខាងស្រុកថៃ ជាពិសេសខេត្តស្រះកែវ ក៏មានកន្លែងទេសចរណ៍ស្អាតល្អក៏គួរឲ្យដើរលេងច្រើនដែរ ហើយភាគីថៃ សុំជួយសម្រួលក្នុងការឆ្លងកាត់ឲ្យបានងាយស្រួល»។
មន្ត្រីទេសចរណ៍ខេត្តបន្ទាយមានជ័យ បានឲ្យដឹងថា នយោបាយលើកលែងទិដ្ឋាការសម្រាប់ប្រជាពលរដ្ឋទាំងពីរប្រទេស គឺមានសារសំខាន់ដល់វិស័យទេសចរណ៍ ព្រោះកន្លងមកការតម្រូវឲ្យមានការបង់ថ្លៃទិដ្ឋាការ ត្រូវចំណាយទាំងថវិកា និងពេលវេលា ៖ «អ៊ីចឹងភ្ញៀវទេសចរណ៍ថៃ ចូលមកច្រើនចាប់ពីថ្ងៃទី១៦ (ធ្នូ) នេះតទៅ ដោយសារតែយើងអត់មានធ្វើវីសាដូចមុនទេ ពីកន្លងមកភ្ញៀវថៃ ដែលចូលមកស្រុកខ្មែរយើងគឺត្រូវធ្វើវីសា»។
អភិបាលខេត្តស្រះកែវ លោក សានិត ណាក់ ស៊ុបស្រ៊ី បានមានប្រសាសន៍ថា នយោបាយលើកលែងទិដ្ឋាការរបស់រដ្ឋាភិបាលកម្ពុជា-ថៃ នឹងជំរុញឲ្យភ្ញៀវទេសចរណ៍ថៃ រួមទាំងទេសចរណ៍ជាតិសាសន៍ដទៃទៀត មានលំហូរកើនឡើងក្នុងការធ្វើដំណើរទៅទស្សនាប្រទេសកម្ពុជា។
របាយការណ៍របស់អាជ្ញាធរខេត្តបន្ទាយមានជ័យ បានឲ្យដឹងថា ចំនួនភ្ញៀវទេសចរណ៍អន្តរជាតិដែលឆ្លងដែនពីទឹកដីថៃ តាមច្រកអន្តរជាតិប៉ោយប៉ែត ក្នុងមួយឆ្នាំមានចំនួនជាង ៣ម៉ឺននាក់ ហើយចំនួនប្រជាពលរដ្ឋថៃ ដែលឆ្លងដែនមកលេងកាស៊ីណូក្នុងទឹកដីខ្មែរ មានចំនួនពី ៥៥ម៉ឺននាក់ ទៅ ៦០ម៉ឺននាក់ក្នុងមួយឆ្នាំ។
Popular Posts
-
សរសេរដោយ ភ្នំពេញដេលីញូវ សុក្រ, 31 ធ្នូ 2010 07:12 ប្រទេសកម្ពុជាយើងមានទីតាំងបុរាណ ជាច្រើនដែលកន្លែងខ្លះបានធ្វើការស្រាវជ្រាវ និង កន្លែងខ្លះ... -
ខ្សែរ៉ក និងក្បូន នៅតាមច្រករបៀងប៉ូលីសជើងគោក 8-91 កំពុងចំលងទំនិញគេចពន្ធយ៉ាងគគ្លើន ប៉ោយ ប៉ែត៖ ទោះបីជាឯកឧត្តមនាយឧត្តមសេ... -
ថ្ងៃសៅរ៍ 01 មករា 2011 សារព៌ត័មានសេរី ពលរដ្ឋ ខ្មែរដែលត្រូវបានទាហានសៀមចាប់ខ្លួននៅពេលឆ្លងដែនចូលទៅក្នុង ទឹកដីរបស់គេក្នុងខេត្...
-
បន្ទាយ មានជ័យៈ ក្រុមរកស៊ីឈើខុសច្បាប់ បានសហការគ្នាជាមួយមេព្រៃ និងសមត្ថកិច្ចមួយចំនួនទៀត ដឹកឈើទាំងយប់ ទាំងថ្ងៃ ចូលមក... -
កម្ពុជាថ្មី ១០មករា ២០១១ ភ្នំពេញ ៖ បទល្មើសគ្រឿងញៀនដ៏ធំនៅខេត្តបន្ទាយមាន ត្រូវបានលាតត្រឡាងបើកវាំងននខ្មៅហើយ ដោយសមត្ថកិច្ចប្រឆាំង...
-
ដោយ ៖ កោះឯករាជ្យ ថ្ងៃ សុក្រ ទី ៣១ ខែ ធ្នូ ឆ្នាំ ២០១០ ក្រុង ប៉ោយប៉ែត ៖ ក្រុមជនជាប់ចោទចាប់រំលោភស្ត្រីលើវាលស្មៅ២នាក់ ក្នុងចំ... -
ដោយ ៖ កោះឯករាជ្យ(កោះសន្តិភាព)ថ្ងៃ សុក្រ ទី ៣១ ខែ ធ្នូ ឆ្នាំ ២០១០ ខេត្តបន្ទាយមានជ័យ ៖ បន្ទាប់ពីជួបប្រជុំពិភាក្សាគ្នារវាងក្រុមមន្ត...
-
អ្នកភូមិនៅបន្ទាយមានជ័យបារម្ភខ្លាចបាត់បង់ដី ដោយ សួន សុផលមុន្នី 2010-12-11 អ្នក ភូមិជិត ៥០០គ្រួសារ រស់នៅតាមបណ្ដោយព្រំដែនខ្មែរ ក...
-
ដោយ៖ ស្ថាបនា 12/01/2011 បន្ទាយមានជ័យ ក្រោយពេលដែល គណៈប្រតិភូមួយក្រុមដឹកនាំដោយលោក អ៊ុង អឿន អភិបាល នៃគណៈអភិបាលខេត្តបន្ទាយ... -
សរសេរដោយ ភ្នំពេញដេលីញូវ ប្តីប្រពន្ធពីរនាក់ក្រោយពីពិនិត្យឈាម ឃើញលទ្ធផលមានផ្ទុកមេរោគអេដស៍ បែកអារម្មណ៍រត់ចូលឡាន ដើម្បីធ្វើអត្ត ឃាតផ្អើលប្រជាព...