ដោយ សួន សុផល មុន្នី
2010-12-25
ខ្មែរ-ថៃ ឯកភាពគ្នាក្នុងការកែប្រែលក្ខខ័ណ្ឌមួយចំនួន ទាក់ទិនការធ្វើដំណើរឆ្លងកាត់ និងដោះដូរពាណិជ្ជកម្មនៅតាមច្រកតំបន់ចំនួនពីរ ក្នុងខេត្តបន្ទាយមានជ័យ និងខេត្តស្រះកែវរបស់ថៃ។
ភាគីអាជ្ញាធរកម្ពុជា និងភាគីអាជ្ញាធរថៃ កាលពីពេលថ្មីៗនេះ បានចេញសេចក្ដីប្រកាសរួមគ្នាមួយ ដោយបានសម្រេចធ្វើការកែប្រែពេលវេលា និងការបន្ថែមចំនួនថ្ងៃ សម្រាប់ប្រជាជាតិនៃប្រទេសទាំងពីរ ក្នុងការធ្វើចរាចរឆ្លងកាត់តាមច្រកតំបន់បឹងត្រកួន និងច្រកម៉ាឡៃ ក្នុងខេត្តបន្ទាយមានជ័យ ជាប់ខេត្តស្រះកែវប្រទេសថៃ។
លោក អ៊ុក កែវរតនៈ មន្ត្រីនាំពាក្យសាលាខេត្តបន្ទាយមានជ័យ បានមានប្រសាសន៍នៅថ្ងៃសៅរ៍ ទី២៥ ខែធ្នូ ឆ្នាំ២០១០ ថា ការឯកភាពគ្នារវាងអាជ្ញាធរខេត្តបន្ទាយមានជ័យ និងអាជ្ញាធរខេត្តស្រះកែវថៃ គឺបានធ្វើឡើងក្រោយពីមានកិច្ចប្រជុំមួយ កាលពីថ្ងៃទី២០ ខែធ្នូ នៅក្នុងខេត្តស្រះកែវ ប្រទេសថៃ ៖ «កន្លងមកច្រកតំបន់ទាំងពីរ គឺច្រកបឹងត្រកួន និងច្រកម៉ាឡៃ ច្រកតំបន់របស់ខេត្ត ពីមុនមក មួយសប្ដាហ៍ យើងបើកតែ ៤ថ្ងៃទេ ពីថ្ងៃអង្គារ ដល់ថ្ងៃសុក្រ ឥឡូវនេះ យើងបានចេញសេចក្ដីប្រកាសរួមមួយ គឺយើងសម្រេចព្រមគ្នាចាប់ពីថ្ងៃទី១ ខែមករានេះទៅ យើងនិងបើកច្រកមួយសប្តាហ៍ ៧ថ្ងៃ ពីថ្ងៃច័ន្ទដល់ថ្ងៃអាទិត្យ គឺចាប់ផ្ដើមពីម៉ោង ៩ព្រឹក រហូតដល់ម៉ោង ៥រសៀល»។
តាមអនុស្សរណៈនៃការយោគយល់គ្នា រវាងរដ្ឋាភិបាលប្រទេសទាំងពីរ កម្ពុជា-ថៃ នាឆ្នាំ១៩៩៨ គឺបានឯកភាពថា ច្រកទ្វារនៅតាមតំបន់ព្រំដែន រវាងប្រទេសកម្ពុជា-ថៃ គឺក្នុង ១សប្តាហ៍ ត្រូវបើកឲ្យធ្វើការឆ្លងកាត់ចំនួន ៤ថ្ងៃ ចាប់ពីថ្ងៃអង្គារ ដល់ថ្ងៃសុក្រ និងមានការបិទបីថ្ងៃ ពីថ្ងៃសៅរ៍ ដល់ថ្ងៃច័ន្ទ។
ការកែប្រែពេលវេលា និងការបន្ថែមចំនួនថ្ងៃនៃការឆ្លងកាត់តាមច្រកតំបន់បឹងត្រកួន និង ច្រកម៉ាឡៃនេះ ក្រុមមន្ត្រីនៃប្រទេសទាំងពីរ កម្ពុជា-ថៃ បានសម្ដែងសុទិដ្ឋិនិយមថា អាចជួយសម្រួលដល់ការឆ្លងកាត់ និងផ្ដល់ផលប្រយោជន៍រវាងប្រទេសទាំងពីរ ៖ «ផលប្រយោជន៍បានទាំង សងខាង ប្រសើរទាំងយើង ប្រសើរទាំងភាគីថៃ ព្រោះសព្វថ្ងៃច្រកនេះជាច្រកដោះដូរដំណាំកសិផល ការនាំកសិផលមានស្រូវ មានដំឡូង មានពោត ឆ្លងកាត់ច្រកនេះទៅខាងថៃ ហើយថៃក៏បាននាំមកនូវភោគផលរបស់ខ្លួនឆ្លងកាត់តំបន់ក៏ច្រើនណាស់ ដែរ ធ្វើឲ្យជីវភាពទាំងប្រជាពលរដ្ឋកម្ពុជាយើង នៅតាមតំបន់ព្រំដែនក៏ដូចជាជីវភាពរបស់ប្រជាពលរដ្ឋថៃនៅតាមតំបន់ ព្រំដែន វាបានទទួលផលប្រយោជន៍ដូចគ្នា»។
កាលពីថ្ងៃអង្គារ ទី១៤ ខែធ្នូ ឆ្នាំ២០១០ កងតម្រួតការពារព្រំដែនប្រចាំការនៅស្រុកតាប់ព្រះយ៉ា ខេត្តស្រះកែវ ប្រទេសថៃ បានបិទច្រកតាប់ព្រះយ៉ា ជាប់ច្រកបឹងត្រកួន ដែលជាច្រកតំបន់ចំនួនពីរថ្ងៃ មិនឲ្យអ្នកធ្វើដំណើរឆ្លងកាត់ ក្រោយពីមានអំពើចោរកម្មកើតមាននៅតំបន់កៀក តំបន់ព្រំដែនក្នុងប្រទេសថៃ។
ទាក់ទិនបញ្ហាសន្តិសុខ ភាគីអាជ្ញាធរខេត្តបន្ទាយមានជ័យ និងអាជ្ញាធរខេត្តស្រះកែវថៃ ក៏ព្រមព្រៀងគ្នាក្នុងការធ្វើកិច្ចសហការពង្រឹងបញ្ហាសន្តិសុខ នៅតាមខ្សែបន្ទាត់តំបន់ព្រំដែនរវាងប្រទេសកម្ពុជា និងប្រទេសថៃ។
លោកឧត្ដមសេនីយ៍ ឌី ភេន នាយការិយាល័យទំនាក់ទំនងព្រំដែនកម្ពុជា-ថៃ បានមានប្រសាសន៍ថា ស្ថានភាពទូទៅនៅតាមខ្សែបន្ទាត់ព្រំដែន ចាប់ពីខេត្តព្រះវិហារ រហូតដល់ខេត្តកោះកុង គឺមិនមានបញ្ហាអ្វីធ្ងន់ធ្ងរទេ ៖ «បើសិនជាយើងមានបញ្ហា ពាក់ព័ន្ធដូចកន្លែងខ្លះ ថៃចាប់ប្រជាពលរដ្ឋយើងចូលទៅក្នុងទឹកដីគេ យើងតែងតែឲ្យកម្លាំងតាមចំណុចដែលពាក់ព័ន្ធ ឡើងទៅសម្របសម្រួលដោះស្រាយ ហើយតែងតែជោគជ័យ»។
ក្រៅការពង្រឹងកិច្ចការពារសន្តិសុខ រដ្ឋាភិបាលកម្ពុជា-ថៃ កាលពីពេលថ្មីៗនេះ ក៏បានព្រមព្រៀងគ្នា ក្នុងការបើកច្រកទ្វារអន្តរជាតិថ្មីមួយទៀត ក្បែរច្រកទ្វារអន្តរជាតិប៉ោយប៉ែត ក្នុងខេត្តបន្ទាយមានជ័យ ជាប់ខេត្តស្រះកែវ ប្រទេសថៃ ដើម្បីបញ្ចៀសការដឹកជញ្ជូនទំនិញធំៗឆ្លងកាត់ ដែលគម្រោងនេះនឹងត្រូវចាប់ផ្ដើមដំណើរការសាងសង់នៅអំឡុងខែឧសភា ឆ្នាំ២០១១៕