ដោយ សួន សុផល មុន្នី
2010-12-23
ពិរុទ្ធជន ក្នុងពន្ធនាគារខេត្តបន្ទាយមានជ័យម្នាក់ បានរត់គេចខ្លួនរួចនៅគ្រាក្រុមអនុរក្សពន្ធនាគារបានបញ្ជូនទៅដេក សម្រាកព្យាបាលជំងឺ នៅឯមន្ទីរពេទ្យមិត្តភាពកម្ពុជា-ជប៉ុន មង្គលបុរី កាលពីពាក់កណ្ដាលយប់ ថ្ងៃទី២០ ខែធ្នូ ឆ្នាំ២០១០។
ប្រធានពន្ធនាគារខេត្តបន្ទាយមានជ័យ លោក ភាន ឆវ័ន្ត បានមានប្រសាសន៍នៅថ្ងៃព្រហស្បតិ៍ ទី២៣ ខែធ្នូ ឆ្នាំ២០១០ ថាពិរុទ្ធជននោះមានឈ្មោះ ហាក់ លី មានជំងឺជាប់ខ្លួន ត្រូវបានខាងពន្ធនាគារបញ្ជូនទៅធ្វើការវះកាត់ និងដេកសម្រាកព្យាបាលនៅមន្ទីរពេទ្យអស់រយៈពេលជាង ២០ថ្ងៃ។
លោកបន្តថា នៅមុនពេលពិរុទ្ធជនរត់រួច កាលពីពាក់កណ្ដាលយប់ថ្ងៃទី២០ ខែធ្នូ ឆ្នាំ២០១០ ខាងពន្ធនាគារបានដាក់អនុរក្សពន្ធនាគារម្នាក់ការពារនៅឯមន្ទីរ ពេទ្យនោះ ៖ «គ្រូពេទ្យបញ្ជាក់មានជំងឺគ្រោះក្នុងប្លោកនោម ហើយវះកាត់រួចហើយជាលើកទី៣ ដេកព្យាបាលបន្ត។ យើងកំពុងចាត់តាមរកធ្វើការរាយការណ៍ជូនព្រះរាជអាជ្ញារួចហើយ»។
ព្រះរាជអាជ្ញាតុលាការខេត្តបន្ទាយមានជ័យ លោក សូវ៉ាត បានមានប្រសាសន៍ថាពិរុទ្ធជន ហាក់ លី ដែលរត់គេចខ្លួននោះ ត្រូវជាប់ចោទពីបទមនុស្សឃាត។ លោកបន្តថា តុលាការបានចេញដីកាឲ្យកងកម្លាំងមានសមត្ថកិច្ចតាមចាប់ខ្លួន ពិរុទ្ធជននោះយកមកឃុំខ្លួនវិញ ៖ «ពីបទមនុស្សឃាត មិនទាន់កាត់ទោសទេ វាឈឺគ្រោះនៅក្នុងតម្រងនោម ចុកទៅក៏យកទៅដេកពេទ្យមង្គលបុរី ប៉ុន្តែដេកពេទ្យហើយដាក់ខ្នោះដៃខ្នោះជើង យប់មានអ្នកយាម។ អ្នកយាមគាត់ថា ក្នុងបន្ទប់គ្មានកន្លែងដេក គាត់មកដេកខាងមុខ ពេលយប់ហ្នឹង គាត់លួចរត់បណ្ដោយ កាត់ច្រវាក់ជើងរត់ ហើយយើងទៅរកឃើញច្រវាក់អីនៅចោលកន្លែងស្មៅ»។
ទោះយ៉ាងណា ខាងមន្ត្រីតុលាការ និងមន្ត្រីពន្ធនាគារខេត្តបន្ទាយមានជ័យមិនបានបញ្ជាក់ព័ត៌មាន ពិស្ដារជុំវិញករណីពិរុទ្ធឈ្មោះ ហាក់ លី ដែលបានរត់គេចខ្លួនរួចនេះទេ។ គេកត់សម្គាល់ឃើញថា នេះជាករណីថ្មីមួយទៀត ដែលខាងមន្ត្រីពន្ធនាគារខេត្តបន្ទាយមានជ័យ មានការធ្វេសប្រហែស ធ្វើឲ្យអ្នកទោសរត់គេចខ្លួនរួច នៅក្រោមការទទួលខុសត្រូវរបស់ខ្លួន។
ទាក់ទិនករណីពិរុទ្ធជនឈ្មោះ ហាក់ លី ដែលទើបរត់គេចខ្លួនរួចថ្មីៗនេះ មន្ត្រីសិទ្ធិមនុស្សនៃសមាគមអាដហុក លោក ស៊ុម ច័ន្ទគា បានស្ដីបន្ទោសថាជាការធ្វេសប្រហែសរបស់ក្រុមមន្ត្រីពន្ធនាគារ។ លោកបានបញ្ជាក់ដូច្នេះថា ៖ «អាហ្នឹងជាចេតនាមិនចំពោះមួយ នៅក្នុងបទល្មើសព្រហ្មទណ្ឌ អ៊ីចឹងគាត់ត្រូវតែទទួលខុសត្រូវអំពីបញ្ហាហ្នឹង អ៊ីចឹងគួរតែរៀបចំពិគ្រោះបញ្ហាហ្នឹង បើសិនខ្លួនមិនមានមន្ត្រីពន្ធនាគារគ្រប់គ្រាន់ ទាក់ទងព្រះរាជអាជ្ញា ដើម្បីឲ្យព្រះរាជអាជ្ញាចេញលិខិតស្នើសុំពីខាងកម្លាំងរាជអាវុធ ហត្ថ ឬក៏ស្នងការ ដើម្បីធ្វើការយាមកាមជននោះ»។
កាលពីថ្ងៃទី១៤ ខែកញ្ញា ឆ្នាំ២០១០ ទណ្ឌិតខ្មែរ-អាមេរិកាំងម្នាក់ ឈ្មោះ អាឡិច ស៊ីនឌឺរព្រឿន ដែលតុលាការកាត់ទោសឲ្យជាប់ពន្ធនាគារចំនួន ១៧ឆ្នាំ ពីបទចាប់ជំរិត និងបង្ខាំងមនុស្សខុសច្បាប់ បានរត់គេចខ្លួនបាត់។ ការគេចខ្លួនរួចនេះ ត្រូវគេចោទថា មានជាប់ពាក់ព័ន្ធនឹងអនុរក្សពន្ធនាគារបីនាក់ និងអតីតប្រធានពន្ធនាគារ លោក នួន វណ្ណា ក្នុងការអនុញ្ញាតឲ្យមានការនាំទណ្ឌិតរូបនោះទៅហាងអ៊ីនធឺណិត និងទៅផឹកស៊ី ច្រៀងសប្បាយនៅហាងខារ៉ាអូខេ។
អនុរក្សពន្ធនាគារបីនាក់ ដែលជាប់ពាក់ព័ន្ធក្នុងករណី ត្រូវបានក្រសួងមហាផ្ទៃសម្រេចដកបញ្ឈរជើងជាបណ្ដោះអាសន្នពីមុខ តំណែង។ នៅក្នុងសំណុំរឿងលេខ៥០៣ ចុះថ្ងៃទី៣០ ខែតុលា ឆ្នាំ២០១០ អតីតប្រធានពន្ធនាគារខេត្តបន្ទាយមានជ័យលោក នួន វណ្ណា ត្រូវបានតុលាការធ្វើការចោទប្រកាន់ពីបទទទួលសំណូក ដោយយោងលើមាត្រា៣៨ នៃច្បាប់សម័យអន្តរកាលអ៊ុនតាក់ ហើយត្រូវគេចាប់ឃុំខ្លួននៅពន្ធនាគារខេត្តសៀមរាបកាលពីពេលកន្លង ទៅថ្មីៗ នេះ៕