លោកខេង ស៊ុម ស្នងការខេត្តបន្ទាយមានជ័យថ្មី ~ BMC INFO

លោកខេង ស៊ុម ស្នងការខេត្តបន្ទាយមានជ័យថ្មី ប្តេជ្ញាថា នឹងអនុវត្តការងារម៉ឺងម៉ាត់ដែលថ្នាក់លើដាក់ជូន

ថ្ងៃ ច័ន្ទ ទី ១៧ ខែ មករា ឆ្នាំ ២០១១
ក្រោមអធិបតីភាពលោកនាយឧត្តមសេនីយ៍នេត សាវឿន អគ្គស្នងការនគរបាលជាតិ លោកអ៊ុង អឿន អភិបាលខេត្តបន្ទាយមានជ័យ ពិធីតែងតាំងស្នងការថ្មីត្រូវបានរៀបចំឡើង លោកខេង ស៊ុម ជាស្នងការនគរបាលខេត្តបន្ទាយមានជ័យ

ក្រោមអធិបតីភាពលោកនាយឧត្តមសេនីយ៍នេត សាវឿន អគ្គស្នងការនគរបាលជាតិ លោកអ៊ុង អឿន អភិបាលខេត្តបន្ទាយមានជ័យ

រាជធានីភ្នំពេញ ៖ លោកខេង ស៊ុម អតីតស្នងការរងខេត្តសៀមរាប ត្រូវបានចូលកាន់តំណែងជាស្នងការនគរបាលខេត្តបន្ទាយមានជ័យ ជំនួសលោកឧត្តមសេនីយ៍ត្រីហ៊ុន ហ៊ាន ដែលកំពុងជាប់ឃុំនៅពន្ធនាគារខេត្តសៀមរាបពាក់ព័ន្ធនឹង បទល្មើសមួយចំនួន បន្ទាប់ពីពិធីតែងតាំងមួយត្រូវបានរៀបចំឡើងកាលពីវេលាម៉ោង២និង ៣០នាទីរសៀលថ្ងៃទី១៧ មករា ២០១១ ក្រោមអធិបតីភាពលោកនាយឧត្តមសេនីយ៍នេត សាវឿន អគ្គស្នងការនគរបាលជាតិ លោកអ៊ុង អឿន អភិបាលខេត្តបន្ទាយមានជ័យ ប្រធាន-អនុប្រធានមន្ទីរ ស្ថាប័នពាក់ព័ន្ធក្នុងខេត្ត កងកំលាំងប្រដាប់អាវុធ និងមន្ត្រីរាជការយ៉ាងច្រើនកុះករ ។

លោកឧត្តមសេនីយ៍ត្រីហ៊ាន សារឿន អនុប្រធាននាយកដ្ឋានបុគ្គលិកបានឡើងអានសេចក្តីប្រកាសរបស់ ក្រសួងមហាផ្ទៃសំរេចតែងតាំងលោកខេង ស៊ុម អតីតស្នងការរងខេត្តសៀមរាប ឡើងកាន់តំណែងជាស្នងការនគរបាលខេត្តបន្ទាយមានជ័យ ក្រោមបរិយាកាសរីករាយ និងស្នូរទាំងដៃអបអរសាទរយ៉ាងកងរំពង ។ លោកខេង ស៊ុម ស្នងការនគរបាលខេត្តបន្ទាយមានជ័យដែលទើបតែតាំងថ្មីបានឡើង ប្តេជ្ញាចិត្តថា លោកនឹងអនុវត្តការងារឱ្យម៉ឺងម៉ាត់ត្រឹមត្រូវតាមការដាក់ចុះ របស់ថ្នាក់លើ...លោកមិនធ្វេសប្រហែសទេ គឺត្រូវរៀបចំសណ្តាប់ធ្នាប់ សន្តិសុខសង្គម សាធារណៈជូនប្រជាពលរដ្ឋឱ្យបានល្អប្រសើរ ជាពិសេសបង្ក្រាបបទល្មើសផ្សេងៗ ចោរកម្ម ជួញដូរចែកចាយគ្រឿង ក្មេងទំនើង...។

លោកនេត សាវឿន អគ្គស្នងការនគរបាលជាតិបានមានប្រសាសន៍ថា ស្នងការថ្មីត្រូវតែអនុវត្តការងារឱ្យបានល្អទាំងការឯកភាពផ្ទៃ ក្នុងស្មារតី បង្ក្រាបបទល្មើសគ្រប់រូបភាព...កុំយកគំរូតាមស្នងការ-ស្នង ការរងចាស់ និងប្រធានផ្នែកឱ្យសោះ ព្រោះនោះជាកំហុសប្រវត្តិសាស្ត្រហើយ...ពួកគេមិនគួរណា យកតួនាទី អំណាចទៅឃុបឃិតជាមួយឈ្មួញទុច្ចរិត ឬអនុវត្តផ្ទុយពីច្បាប់នោះឡើយ ។

គួររំលឹកថា លោកហ៊ុន ហ៊ាន ស្នងការនគរបាលខេត្តបន្ទាយមានជ័យ ត្រូវបានដកហូតមុខតំណែងចំថ្ងៃប្រារព្ធទិវាជ័យជំនះ៧ មករា ដែលថ្ងៃជោគជ័យនេះមន្ត្រីជាច្រើនបានជប់លៀងសប្បាយរីករាយ ប៉ុន្តែលោកហ៊ុន ហ៊ាន បែរជាទទួលរងនូវភាពក្រៀមក្រំសោះកក្រោះគួរឱ្យសង្វែគទៅវិញ ...អ្នកដែលឡើងកាន់តំណែងស្នងការស្តីទីគឺលោកចាន់ កុសល អតីតស្នងការរងនៃអង្គភាពនេះ ។

ពិធីផ្លាស់ប្តូរមុខតំណែងបានប្រព្រឹត្តទៅកាលពី រសៀលថ្ងៃទី៧ មករា ២០១១ នៅស្នងការដ្ឋាននគរបាលខេត្ត ដោយមានការអញ្ជើញចូលរួមពីលោកអភិបាលខេត្តអ៊ុង អឿន អភិបាលរងខេត្ត លោកឧត្តមសេនីយ៍ចាន់ អ៊ាន អគ្គស្នងការរងនគរបាលជាតិ មន្ត្រីក្រសួងមហាផ្ទៃ កងកំលាំងប្រដាប់អាវុធ ប្រធាន-អនុប្រធានមន្ទីរជុំវិញខេត្ត ។ ការដកហូតមុខតំណែងនេះ ត្រូវបានប្រភពស្និទ្ធនឹងក្រសួងមហាផ្ទៃនិយាយថា ភាគច្រើនលោកហ៊ុន ហ៊ាន ខ្វះចន្លោះក្នុងកិច្ចការរដ្ឋបាលដឹកនាំ និងចំណាត់ការខ្សោយក្នុងការពារសន្តិសុខសង្គម ព្រមទាំងពាក់ព័ន្ធនឹងអំពើពុករលួយខ្លះផង ៕

BMC INFO

Blogger templates

Blogger news

Archives

Followers