បន្ទាយមានជ័យៈ អ្នកបើកបររថយន្តតាក់ស៊ីផ្លូវប៉ោយ ប៉ែត-សៀមរាប ប្រមាណមួយរយនាក់បានធ្វើការតវ៉ានៅចំណតរថយន្តឈ្នួលក្រុងប៉ោយ ប៉ែត ខេត្តបន្ទាយមានជ័យ កាលពីល្ងាចថ្ងៃអង្គារ ប្រឆាំងនឹងសមាគមទេសចរណ៍ ដែលមិនឲ្យពួកគេដឹកភ្ញៀវទៅកាន់គោលដៅរបស់ពួកគេ។
លោក សេង ពិសិដ្ឋ ប្រធានសមាគមរថយន្តឈ្នួលក្នុងខេត្តបន្ទាយមានជ័យ បានថ្លែងនៅថ្ងៃនេះថា យើងបានធ្វើការតវ៉ាប្រឆាំងនឹងសមាគមទេសចរណ៍ ដែលមិនអនុញ្ញាតឲ្យអ្នកបើកបររថយន្តតាក់ស៊ីដឹកភ្ញៀវទេសចរទៅ សណ្ឋាគារ ឬផ្ទះសំណាក់ដែលជាកន្លែងភ្ញៀវជួលឲ្យពួកគេដឹកទៅ។
លោកបានថ្លែងថា៖ «អ្នកបើកតាក់ស៊ីធម្មតាមានបញ្ហាជាមួយភ្ញៀវរបស់ពួកគេស្ទើររាល់ ថ្ងៃ ព្រោះភ្ញៀវបានឲ្យពួកគេដឹកទៅសណ្ឋាគារ ឬផ្ទះសំណាក់ តែសមាគមទេសចរណ៍បានបញ្ជាឲ្យអ្នកបើកតាក់ស៊ីដាក់ភ្ញៀវចុះនៅ ការិយាល័យសមាគមរបស់ពួកគេ ដើម្បីឲ្យភ្ញៀវជិះតុកតុកទៅគោលដៅដែលពួកគេចង់ទៅ»។
លោកបានបន្តថា បុគ្គលិកសមាគមទេសចរណ៍បានប្រាប់ពួកគេថា បើយើងមិនដឹកភ្ញៀវមកដាក់នៅសមាគមទេសចរណ៍ទេ ពួកគេនឹងមិនឲ្យយើងដឹកភ្ញៀវតទៅទៀតឡើយ។